နှစ်မျိုးသုံးရော်ဘာမျိုးလို့ခေါ်တဲ့ LT ကလုန်း(clone)

အိန္ဒိယမှာ မြေဧရိယာပေါင်း ဟက်တာ ၇ သိန်းဟာ ရော်ဘာစိုက်ခင်းအနေနဲ့ ရှိနေတာပါ။ အခုအချိန်မှာ ရော်ဘာစိုက်တောင်သူတွေဟာ ရော်ဘာဈေးကကျ၊ ဝင်ငွေကနည်း၊ အလုပ်သမားခတွေက ဈေးကြီးနေတော့ အခက်အခဲနဲ့ ရင်ဆိုင်နေရတဲ့ ကာလဖြစ်နေပါတယ်။ ရော်ဘာနဲ့ပတ်သက်တဲ့ သိပ္ပံပညာတိုးတက်မှုအသစ်တွေက ရော်ဘာတောင်သူတွေအဖို့ ဒီအခက်အခဲတွေကို အတိုင်းအတာတစ်ခုအထိ ကျော်လွှားနိုင်အောင် ကူညီနိုင်ပါလိမ့်မယ်။

ဟီဗီးယား ဘရာစီလန်းစစ်ဆိုတဲ့ ရော်ဘာပင်ဟာ ကေရာလာနဲ့ အရှေ့မြောက်ပြည်နယ်တွေမှာ အဓိကစိုက်ကြတဲ့ စိုက်ခင်းပင်တစ်မျိုးပါ။ ဒီအပင်ရဲ့ အခေါက်ကို ခြစ်ပြီးရလာတဲ့ အစေးကို တိုင်ယာတွေအပြင် ကွန်ဒုံးနဲ့ ခွဲစိတ်ခန်းသုံးလက်အိတ်တွေလို ထုတ်ကုန်တွေ ပြုလုပ်ရာမှာသုံးပါတယ်။ အထွက်ကောင်းလှပါတယ်ဆိုတဲ့ စပ်မျိုးပင်တွေတောင် နှစ်အစိတ်ကျော်လာရင် အစေးထွက် နည်းလာပါတယ်။ ဒါနဲ့ အသက်ကြီးပင်တွေကို ခုတ်ပြီး အသစ်ပြန်စိုက်ကြလေ့ရှိပါတယ်။

အစဉ်အလာအတိုင်းဆို ခုတ်လှဲလိုက်တဲ့ ရော်ဘာသားကို ကုန်သေတ္တာလုပ်ရာမှာ သုံးလိုက်ရတယ်။ အကြောင်းက သစ်သားညံ့လို့ကတစ်ကြောင်း၊ မှိုကြောင့် အသားပျက်ကာ ညံ့သွားလို့ကတစ်ကြောင်းကြောင့်ပါပဲ။ ဒါနဲ့ အိမ်ထောင်ပရိဘောဂလုပ်ဖို့နဲ့ အခြားကိစ္စရပ်တွေမှာ မသုံးကြပါဘူး။ လက်ယှက်ဆက်တဲ့နည်းပညာနဲ့ သစ်သားကိုကြာရှည်ခံအောင်လုပ်တဲ့နည်းပညာတွေလို သစ်သားနဲ့ပတ်သက်တဲ့ သိပ္ပံနည်းပညာတိုးတက်မှုအသစ်တွေက ရော်ဘာသစ် အသုံးချမှုလမ်းသစ်တွေကို ပွင့်လာစေတယ်။ ရော်ဘာသားဟာ လှပပြီး ဈေးသက်သာတဲ့ အတွက်ကြောင့် ဈေးကွက်မှာ ရော်ဘာသားနဲ့ ပြုလုပ်ထားတဲ့ ပရိဘောဂတွေဟာ ရောင်းပန်းလှနေပါတယ်။

မလေးရှားတို့လို ရော်ဘာစိုက်တဲ့ တိုင်းပြည်တွေက အစပထမမှာ ရော်ဘာစေးထုတ်ဖို့ အသုံးပြုနိုင်တဲ့ ရော်ဘာပင်တွေကို တိုးတက်ထုတ်လုပ်ဘို့ ကြိုးပမ်းနေကြပြီဖြစ်တယ်။ ရော်ဘာစေးအထွက်လျော့သွားတဲ့နောက်ပိုင်းမှာ အပင်တွေကို ခုတ်လှဲပြီး ရော်ဘာသားအနေနဲ့ အခြားနေရာမှာ အသုံးချမှာဖြစ်တယ်။ ဤကဲ့သို့ ၂ မျိုးသုံးရော်ဘာမျိုးကလုန်း( clone) သို့မဟုတ် စပ်မျိုးက တောင်သူတွေအဖို့ ဝင်ငွေ ၂ ဆ ရစေမှာဖြစ်တယ်။ ဒါပေမယ့် အိန္ဒိယရဲ့ ရော်ဘာဖွံ့ဖြိုးရေးလုပ်ငန်းက ရော်ဘာစေးအထွက်တိုးရေးကိုသာ အာရုံစိုက်နေပြီး ရော်ဘာသားရဲ့ အရည်အသွေးကောင်းအောင်ကြိုးပမ်းဖို့ကိုကျတော့ လစ်လျူရှုထားကြတယ်။ အခုတော့ ပြောင်းလဲလာပါပြီ။ စောစောပိုင်းလေ့လာမှုတွေက ရွေးချယ်မျိုးစပ်တဲ့ အစီအစဉ်တွေကနေ ရော်ဘာသားရဲ့ အရည်အသွေး ကောင်းလာနိုင်တယ်ဆိုတဲ့ သက်သေပြနိုင်နေပြီဖြစ်တယ်။

ဒါက အိန္ဒိယမှာ ရော်ဘာနဲ့ပတ်သက်ပြီး ကြိုးပမ်းနေပုံတွေပါ။ ၂ မျိုးသုံးရော်ဘာမျိုးလို့ခေါ်တဲ့ LT clone တွေကို မလေးရှားတို့အင်ဒိုတို့မှာ သုတေသနလုပ်နေတာတော့ကြာပါပြီ။

L ဆိုတာ Latex ရော်ဘာစေးနဲ့ T က timber သစ်သား နှစ်မျိုးလုံးအရည်အသွေးကောင်း အထွက်ကောင်းအောင် မျိုးစပ်ထားတဲ့ ရော်ဘာမျိုးပါ။ ကျနော်တို့ဆီမှာလည်း ဘယ်ဒေသမှာ ဘယ်အပင်မျိုး ဘယ် ကလုန်း(clone) က အဆင်အပြေဆုံးဆိုတာ သုတေသနလုပ်ပြီး ရော်ဘာစိုက်တောင်သူတွေကို အသိပညာပေးသင့်ပါတယ်။ စမ်းတဝါးဝါးစိုက်နေရတဲ့ တောင်သူတွေအဖို့ ငွေကုန် အချိန်ကုန်မဖြစ်ရအောင်ပါ။ ရော်ဘာက နှစ်ရှည်ပင်ဖြစ်တော့ ထွက်တဲ့အချိန် ၇ နှစ်ကြာမှ သိရတဲ့အခါ အလွန်နစ်နာလှပါတယ်။ ခုဆိုရင် ၂၀၀၀ ပြည့်နှစ်ဝန်းကျင်ကစမ်းစိုက်ခဲ့တဲ့ LT clone ဖြစ်တဲ့ ၂၀၀၀ စီးရီးတွေ အစေးစထွက်ပါပြီ။ သေချာစုံစမ်းကြပါ။ ထားဝယ်ဘက်မှာက ဘယ်လို။ လှည်းကူးဘက်မှာဘယ်သို့၊ ကချင်ဘက်မှာ ဘယ်ပုံ ရာသီဥတုမြေခံမတူကြတာကြောင့် အထွက်တွေတူကြမှာမဟုတ်ဘူး။

ညီသွေး

East West Seed Myanmar ကြော်ငြာ

မျိုးစေ့မမှန် ပင် မသန် ဆိုတဲ့စကားနဲ့ အညီ စိုက်ပျိုးထုတ်လုပ်သူ ဦးကြီးတို့ အနေနဲ့ မဝယ်ခင် မစိုက်ခင် ဘာသီးနှံကို စိုက်မလဲ ဘယ်မျိုးကို ဝယ်မလဲဆိုတာက အဓိက စဥ်းစားရမယ့် အချက်ပါ...ရွေးချယ်မှု မှန်ကန်မှ အောင်မြင်ဖြစ်ထွန်းပြီး အရည်အသွေးမြင့်တဲ့ သီးနှံများ ရရှိမှာ ဖြစ်ပါတယ်...အပူပိုင်းဟင်းသီးဟင်းရွက် မျိုးစေ့ လောကမှာ ကမ္ဘာ့ အဆင့် (၁)အဖြစ် ရပ်တည်နေတဲ့ East-West Seed မြားနီမျိုးစေ့ကုမ္ပဏီကတော့ အရည်အသွေးအာမခံချက်အပြည့်ရှိတဲ့ ကုမ္ပဏီ တစ်ခုဖြစ်ပါတယ်...မစိုက်ခင် မဝယ်ခင် မျိုးရွေးချယ်မှု မှန်ကန်စိတ်ချရအောင် မြားနီမျိုးစေ့ မှ အရည်အသွေးမြင့် အောက်ပါမျိုးများနဲ့ မိတ်ဆက်ပေးလိုက်ပါတယ်ဗျာ