ဂိုရာမီလေး (ခေါ်) ဂျပန်ငါး မွေးမြူရေး

ဘီလား(ခေါ်)ဂိုရာမီလေး(ခေါ်) ဂျပန်ငါးမှာ မွေးမြူ၍ရသောငါးအမျိုးအစားတွင် ပါဝင်သဖြင့် မွေးမြူနည်းလေးကိုဖော်ပြပေးလိုက်ပါသည်။

ကန်ဖြင့် မွေးမြူခြင်း

(က) သဘာဝအတိုင်းမွေးမြူခြင်း 

အရွယ်အားဖြင့်(၈)ကောင်မှ (၁၀)ကောင်လျှင် ၁ကီလိုဂရမ်အလေးချိန်ရှိသည့် ဂိုရာမီလေးငါး အထီးနှင့်အမ အရောအနှောကို ၁ဧက ကန်အကျယ်အတွက် အလေးချိန်စုစုပေါင်း ၂၀ ကီလိုဂရမ် မှ ၄၀ ကီလိုဂရမ်နှုန်းအထိ သဘာဝအတိုင်း ထည့်သွင်းမွေးမြူနိုင်ပါသည်။ ရလဒ်အနေဖြင့် သန္ဒေအောင်ပြီး ဥ ရရှိမှုရာခိုင်နှုန်း သေချာမသိရှိနိုင်ခြင်းနှင့် အကြိမ်များစွာသားပေါက်သဖြင့် များစွာသောမျိုးဆက်များ ရောနှောနေသည့်ရလဒ်များ ရရှိပါလိမ့်မည်။

(ခ) ဆေးထိုးသားဖောက်ခြင်း

အရွယ်အားဖြင့် (၈)ကောင်မှ (၁၀)ကောင်လျှင် ၁ကီလိုဂရမ် အလေးချိန်ရှိသည့် ဂိုရာမီလေးငါး အထီးနှင့်အမကောင်ရေအချိုး (၁ အချိုး ၁) နှုန်းဖြင့် ဆေးထိုးပြီး ၁ဧကကန်အကျယ်အတွက် အလေးချိန်စုစုပေါင်း ၂ကီလိုဂရမ် မှ ၄ကီလိုဂရမ် နှုန်း အထိ ထည့်သွင်းမွေးမြူနိုင်ပါသည်။

သဘာဝအတိုင်းဆေးမထိုးဘဲ လွတ်၍ မွေးမြူသောနည်းနှင့် ဆေးထိုးပြီး လွတ်၍ မွေးမြူသောနည်းစနစ်(၂)ရပ်စလုံးသည် သေဆုံးနှုန်းနှင့်ရှင်သန်နှုန်းကို ခန့်မှန်းမသိရှိနိုင်ဘဲ သဘာဝအစာရရှိမှု၊ ရေအရည်အသွေးနှင့် မွေးမြူကန်အတွင်း အသားစားငါးများ ရှိမှုအပေါ်မူတည်ပါသည်။

ပြုစုမွေးမြူခြင်း

ဆေးထိုးသားဖောက်ပြီးရရှိလာသော ငါးသားပေါက် (၂-၃) စင်တီမီတာအရွယ်တို့အား ၁ဧကကန်အကျယ်တွင် ကောင်ရေ (၂၅၀၀၀) ကောင်ရေနှုန်း ထည့်သွင်းမွေးမြူနိုင်ပါသည်။ ထို့နောက် ဆက်လက်၍ ကန်အကြီးအတွင်းသို့ ပြောင်းရွှေ့ထည့်သွင်းပြီး လိုအပ်သောအရွယ်အထိ ထည့်သွင်းမွေးမြူနိုင်ပါသည်။

အုတ်ကန်ဖြင့် မွေးမြူခြင်း 

အုတ်ကန်ဖြင့်မွေးမြူမည်ဆိုပါက အုတ်ကန်အတွင်းသို့ ရေချိုအားစစ်ပြီး ရေအမြင့် ၁၅ စင်တီမီတာ မှ ၂၀ စင်တီမီတာအထိ ဖြည့်ပေးရပါမည်။ ၄င်းအုတ်ကန်အတွင်းသို့ ငါးအထီးမှ အသိုက်ကိုက်ပြီး မိတ်လိုက်သားပေါက်နိုင်ရန် မြက်များကို ထည့်ပေးရပါမည်။ မျိုးငါးထည့်သွင်းပြီးသောအခါ ၄င်းအုတ်ကန်အား နေရောင်တိုက်ရိုက်ကျရောက်ခြင်းနှင့် အခြားသော အနှောက်အယှက်များ လျော့ချနိုင်ရန် အဖုံးကာထားရပါမည်။ ထို့နောက် အဆိုပါအုတ်ကန်အတွင်း မျိုးငါးများ ဆေးထိုးသားဖောက်နိုင်ရန် မျိုးငါးအထီးနှင့်အမတို့ကို လှောင်အိမ်ခွဲပြီး ထည့်လှောင်ထားရပါမည်။ မျိုးငါးများကိုရွေးချယ်ရာတွင် အရွယ်အားဖြင့် (၁၅-၂၀)စင်တီမီတာနှင့် အလေးချိန်အားဖြင့် (၁၀၀-၁၃၀)ဂရမ် ရှိသော သက်တမ်းအားဖြင့် (၆-၇)လ အရွယ် မျိုးငါးများအား ရွေးချယ်ရပါမည်။ 

ဘီလား(ခေါ်) ဂိုရာမီလေးငါးကို မွေးမြူစေခြင်း ရည်ရွယ်ချက်မှာ -

၁။ တိုင်းရင်းငါးမျိုးများ မျိုးသုဥ်းပျက်စီးမှုမှ ထိန်းသိမ်းကာကွယ်ရန်နှင့် ပေါက်ပွားနှုန်း တိုးပွားလာစေရန်။

၂။ ငါး/ပုစွန် သယံဇာတများ ရေရှည်ဖမ်းဆီးမွေးမြူထုတ်လုပ်နိုင်ရေးအတွက် တိုင်းရင်းငါးမျိုးများ အင်းအတွင်း ချန်လှပ်မွေးမြူစေရန်။

၃။ ကျေးလက်တောင်သူလယ်သမား မိသားစု တစ်ဦးချင်းစီ၏ ငါးစားသုံးမှု ပိုမိုတိုးတက်လာစေရန်နှင့် ကျေးလက်ဒေသရှိ မိသားစုများ တစ်ပိုင်တစ်နိုင် ငါးမွေးမြူရေးလုပ်ငန်း ဖွံ့ဖြိုးတိုးတက်လာစေရန် ဖြစ်ပါသည်။

 

ကိုးကား- ငါးလုပ်ငန်းဦးစီးဌာန။

ဘီလားငါးခြောက် ပြုလုပ်နည်းကို ဒီ ဘီလားငါး(ခေါ်)ဂိုရာမီလေး ဆောင်းပါးမှာ လေ့လာပါ။

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ပြန်လည်ကူးယူဖော်ပြပါသည်" ဟု ထည့်ပေးပါရန် မေတ္တာရပ်ခံအပ်ပါသည်။