တစ်ပတ်အတွင်း ကမ္ဘာ့ရော်ဘာဈေးကွက် သုံးသပ်ချက်

ပြီးခဲ့တဲ့အပတ်သောကြာနေ့မှာ အတက်နဲ့ပိတ်ပြီး၊ တနင်္လာနေ့ဈေးပြန်ဖွင့်တဲ့နေ့မှာလည်း တက်လိုက်တာ တိုကျို ကုန်စည်အိတ်ချိန်း TOCOM မှာ ရော်ဘာဈေးက သုံးလခွဲအတွင်း အမြင့်ဆုံးဈေးကို ရောက်သွားတယ်။ TOCOM ကိုကြည့်ကြတဲ့အကြောင်းက ဒီဈေးကွက်ဟာ ကျနော်တို့အရှေ့တောင်အာရှရဲ့ တိုင်ယာသုံးရော်ဘာ RSS3 ဈေးကို အရိပ်ထိုးလို့ပဲ။ တစ်ခါ TOCOM ကလည်း ခုနောက်ပိုင်း ရှန်ဟိုင်းရဲ့ SHFE ဈေးကွက်ကို မှီနေပြန်တယ်။ တရုတ် SHFE မှာက ဈေးကွက်ကြီးတယ်။ အနုတ်အသိမ်းများတယ်လေ။ တရုတ်က ရော်ဘာ ဝယ်လက် အကြီးဆုံးဖြစ်နေတယ်။ အခုတနင်္လာနေ့မှာ တက်တာလည်း SHFE မှာ ဈေးမာ နေလို့ပါ။

တနင်္လာနေ့မှာ ဒေါ်လာနဲ့ယှဉ်တဲ့ယန်းဈေးကမြင့်နေတယ်။ ဒီတော့ ယန်းနဲ့ သတ်မှတ်ထားတဲ့ ရော်ဘာကို အခြား ငွေကြေးဒေါ်လာနဲ့ဝယ်တဲ့အခါ ဈေးကြီးသွားတယ်။ ဈေးကြီးရင် အဝယ်နည်းပြီး ဈေးကျရမယ်။ ဒါပေမယ့် တနင်္လာနေ့မှာ ဈေးတက်တာက SHFE ဈေးကသိပ်မာ နေလို့ပါ။

သူတို့ဆီက ဈေးကွက်ကျွမ်းကျင်သူခန့်မှန်းတာက “ရော်ဘာဈေးတက်စရာ အကြောင်းအရင်းဘာမှမရှိပေမယ့် တရုတ်နှစ်သစ်ကူးမတိုင်မီ သူတို့ဆီမှာဈေးတက်လေ့ရှိတော့ သူတို့ဝယ်စုကြတယ်လေ။ နောက်ပြီး ရော်ဘာဈေးက အခြေခံအားဖြင့်ကို ကောင်းနေတာမဟုတ်တော့ ဒီလိုဈေးတက်တာက ရေရှည်ခံမှာမဟုတ်ပါဘူး” တဲ့။

အင်္ဂါနေ့နဲ့ ဗုဒ္ဓဟူးနေ့ မှာတော့ တိုကျိုရဲ့ TOCOM ရော်ဘာဈေးဟာ သုံးလခွဲအတွင်းအမြင့်ဆုံး ရောက်နေရာမှ အနိမ့်ဆုံးနီးပါး ပြန်ဆွဲချသွားပါတယ်။ ရင်းနှီးမြှုပ်နှံသူတွေက ဈေးအတက်မှာ အမြတ်နဲ့ထုတ်ရောင်းကြတဲ့ အတွက်ကြောင့်ရယ်၊ ယန်းကလည်း ဒေါ်လာနဲ့ ယှဉ်ရာမှာ အမြင့်မှာဆက်ရှိနေတာကြောင့်ရယ်ပါပဲ။ ထုတ်ရောင်း ကြရင် ဈေးကွက်မှာပစ္စည်းများလာမယ်။ တစ်ခါ ယန်းကမာနေတော့ ဒေါ်လာနဲ့ဝယ်ရင် ဈေးကြီး နေဦးမယ်။ ပြီးတော့ သူမှီနေတဲ့ ရှန်ဟိုင်းဈေးကလည်း တစ်တန်ကို ၁၄၅ ယွမ်တောင်ကျသွားတော့ TOCOM ကဘယ်နေတော့မလဲ ကျပြီပေါ့။ စျေးပိတ်တော့ ၂၁၂.၉ ယန်း/ကီလိုဂရမ်ဈေးနဲ့ပိတ်တယ်။

ကြာသပတေးနေ့မှာ တိုကျိုရဲ့ TOCOM မှာဈေးပြန်တက်သွားပါတယ်။ ၂ ရက်တာ ဈေးကျနေပြီးနောက် ထိုင်းနိုင်ငံမှ ရော်ဘာလက်ငင်းဈေး(physical price) မြင့်လာတယ်၊၊ ယန်းငွေဟာလည်း အမေရိကန် ဒေါ်လာနဲ့ ယှဉ်ရာမှာ ဈေးနိမ့်သွားတဲ့အတွက်ကြောင့်ပါပဲလို့ ကုန်သည်တွေက ပြောပါတယ်။

" ထိုင်းမှ ရော်ဘာထုတ်လုပ်သူတွေက ဈေးအမြင့်ရကြတာကလည်း ဈေးကွက်ကို အထောက်အပံ့ပြုပါတယ်" လို့ တိုရှိတက တဇဝ ကပြောပါတယ်။ သူက ဖူဂျီတိုမိကုမ္ပဏီမှ ကုန်စည်လေ့လာဆန်းစစ်သူပါ။ ထိပ်သီးရော်ဘာ ထုတ်လုပ်သူ ၃ နိုင်ငံရဲ့ ရော်ဘာအိတ်စပို့လျှော့ချခြင်းက အကျိုးသက်ရောက်မှုရှိလာပြီလို့ သူက မှတ်ချက်ပြု ပါတယ်။ ယန်းဈေးကျရင် ယန်းနဲ့သတ်မှတ်တဲ့ ရော်ဘာဟာ ဒေါ်လာနဲ့ဝယ်ရင် ဈေးသက်သာကာ အဝယ်လိုက် ပါတယ်။ အဝယ်လိုက်တော့လည်း ဈေးတက်ရပြန်တာပါပဲ။

ရော်ဘာဈေးအတက်/အကျ အကြောင်းရင်းတွေက တွေ့ရတဲ့အတိုင်း အမျိုးမျိုးပါပဲ။ ခုတွေ့ရတာက ပုံမှန်အတက် အကျဖြစ်စေတဲ့ အကြောင်းတွေပါ။ တကယ့်အကြောင်းအရင်း ကြီးကြီးမားမားကလည်း မဖြစ်သေးတော့ ရော်ဘာ ဈေးဟာ ခုဈေးတစ်ဝိုက်မှာပဲ တက်လိုက်ကျလိုက်နဲ့ဖြစ်နေဦးမှာပါ။

ညီသွေး

East West Seed Myanmar ကြော်ငြာ

မျိုးစေ့မမှန် ပင် မသန် ဆိုတဲ့စကားနဲ့ အညီ စိုက်ပျိုးထုတ်လုပ်သူ ဦးကြီးတို့ အနေနဲ့ မဝယ်ခင် မစိုက်ခင် ဘာသီးနှံကို စိုက်မလဲ ဘယ်မျိုးကို ဝယ်မလဲဆိုတာက အဓိက စဥ်းစားရမယ့် အချက်ပါ...ရွေးချယ်မှု မှန်ကန်မှ အောင်မြင်ဖြစ်ထွန်းပြီး အရည်အသွေးမြင့်တဲ့ သီးနှံများ ရရှိမှာ ဖြစ်ပါတယ်...အပူပိုင်းဟင်းသီးဟင်းရွက် မျိုးစေ့ လောကမှာ ကမ္ဘာ့ အဆင့် (၁)အဖြစ် ရပ်တည်နေတဲ့ East-West Seed မြားနီမျိုးစေ့ကုမ္ပဏီကတော့ အရည်အသွေးအာမခံချက်အပြည့်ရှိတဲ့ ကုမ္ပဏီ တစ်ခုဖြစ်ပါတယ်...မစိုက်ခင် မဝယ်ခင် မျိုးရွေးချယ်မှု မှန်ကန်စိတ်ချရအောင် မြားနီမျိုးစေ့ မှ အရည်အသွေးမြင့် အောက်ပါမျိုးများနဲ့ မိတ်ဆက်ပေးလိုက်ပါတယ်ဗျာ