အသီးယူနေတဲ့သရက်ပင်တွေကို ဘာကြောင့် ကိုင်းပြင်၊ ကိုင်းရှင်းပေးသင့်တာလဲ?

အသီးယူနေတဲ့သရက်ပင်တွေကို ကိုင်းပြင်၊ ကိုင်းရှင်းခြင်း ပြုလုပ်ပေးရတဲ့အကြောင်းအရင်းကို မြန်မာ့သရက် ဈေးကွက်နှင့်နည်းပညာ ဖွံ့ဖြိုးတိုးတက်ရေးအသင်း ဒုတိယဥက္ကဌ ဦးမြင့်မော် အား ဆက်သွယ်မေးမြန်းခဲ့ပါတယ်။

ဘာကြောင့် ကိုင်းပြင်၊ ကိုင်းရှင်းပေးသင့်တာလဲ?

(၁) အပင်ရဲ့အရပ် (အမြင့်) ကို ထိမ်းသိမ်းပေးခြင်း

သရက်ပင်ရဲ့အရပ် (အမြင့်) ကို ထိမ်းသိမ်းနိုင်ဖို့အတွက် ခေါင်နှိမ်ခြင်း၊ ခေါင်ဖွင့်ခြင်းတွေကို ပြုလုပ်ပေးရပါတယ်။ အသီးခူးပြီးနောက်မှာ အပင်ရဲ့အရပ်ကို (၁ဝ)ပေ အမြင့်မှာ ပြန်ချပြီး၊ အသီးခူးချိန်မှာ (၁၂/၁၃) ပေ အမြင့်မှာရှိနေအောင် ထိမ်းသိမ်းထားသင့်ပါတယ်။ ဒီလိုမျိုး အရပ်အမြင့်တွေကို စနစ်တကျထိန်းသိမ်းပြုပြင်ပေးမှလည်း ဆေးဖြန်းခြင်း၊ အသီးရွေးချယ်ခြင်း၊ အသီးအိတ်စွပ်ခြင်း၊ အသီးခူးဆွတ်ခြင်းဆိုတဲ့ လုပ်ဆောင်ချက်တွေမှာ လျင်မြန်ချောမွေ့ပြီး ကုန်ကျစရိတ်သက်သာမှာ ဖြစ်ပါတယ်။

(၂) နေရောင်ခြည်ရရှိပြီး လေဝင်လေထွက်ကောင်းမွန်ကာ ရောဂါပိုးမွှားအန္တရာယ်မှ ကာကွယ်ပေးခြင်း

ခေါင်နှိမ်ခြင်း၊ ခေါင်ဖွင့်ပေးခြင်း လုပ်ငန်းစဉ်တွေ လုပ်ကိုင်တဲ့အခါ ရောဂါရနေတဲ့ ကိုင်းများ၊ ကိုင်းသေကိုင်းခြောက်များနဲ့ လင်းရိပ်ကျရောက်ပြီး အပင်အတွက် အကျိုးမပြုတဲ့ ကိုင်းသိမ် ကိုင်းမွှားတွေကို ဖယ်ရှားဖြတ်တောက် ရှင်းလင်းပေးရပါမယ်။ ဒါမှသာ ကျန်းမာသန်စွမ်းပြီး အရည်အသွေးကောင်းသရက်တွေ သီးနိုင်မှာပါ။

(၃) အရည်အသွေးကောင်းမွန်သော အသီးများထုတ်လုပ်ပေးနိုင်ခြင်း

ဆေးဖျန်းခြင်းကို လွယ်ကူလျင်မြန်စွာ ပြုလုပ်နိုင်တဲ့အတွက် ရောဂါပိုးမွှားတွေကို နိုင်နင်းစွာ ထိန်းချုပ်လာနိုင်မှာပါ။ အပင်အရပ်က လူရဲ့လက်တကမ်းမှာရှိလို့ အသီးများကို လွယ်ကူစွာရွေးချယ်နိုင်ပါလိမ့်မယ်။ သရက်သီးကြီးထွားမှုလည်း ပိုလာနိုင်ပါတယ်။ အသီးခူးယူရာမှာ လိုက်နာသင့်တဲ့ ဆောင်ရန်ရှောင်ရန်တွေကို တိကျစွာလိုက်နာနိုင်မှာဖြစ်လို့ ဒါဏ်ရာအနာအဆာမရရှိအောင် ခူးဆွတ်နိုင်လာပါမယ်။ လုံးပိန်၊ လုံးညှပ်တွေနဲ့ ပုံမမှန်အသီးမျိုးတွေကို ချွေချပြီး အရည်အသွေးကောင်းမွန်တဲ့ အသီးမျိုးကို ရွေးချယ်နိုင်လာမှာ ဖြစ်ပါတယ်။

စတဲ့ အကျိုးကျေးဇူးတွေရရှိစေဖို့အတွက် ကိုင်းပြင်၊ ကိုင်းရှင်းခြင်းကို ပြုလုပ်ပေးသင့်ပါတယ်။

(ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ကို ထည့်ပေးရန် မေတ္တာရပ်ခံအပ်ပါသည်)